Чурибураштан Нургалиевлар гаиләсе республикада икенче урынны яулады

Бу гаилә 2016 елда да шундый ук ярышларның кышкы төрләрендә дә катнашып, барлык катнашучы командалар арасында өченче урын яулаган иде.

Быелгы җәйге спорт төрләре буенча республика финал ярышларына Руслан үзе, бик сөйкемле тормыш иптәше, шулай ук шушы мәктәптә татар теле һәм әдәбият укытучысы Ләйсән һәм 11 яшьлек уллары Раян белән 18 майда чыгып китте. Ярышлар Мамадышта үтте һәм алар 20 майда төгәлләнде. Нургалиевлар гаиләсе быел да бик уңышлы чыгыш ясап, республикада икенче урынга лаек булды.

-Безнең гаилә спорт белән бик дус яши,-ди Руслан. –Мамадышта үткән Татарстан беренчелеге ярышлары спорт программасына шашка, өстәл теннисы, дартс һәм гаилә эстафетасы кертелгән иде. Бик әзерләнеп барган идек. Шуңа да көндәшләрдән әлләни курыкмадык. Тагын да шундый республикакүләм ярышларда катнаша калсак, беренче урын яуларга исәп!..

Ришат Җамалиев.