“Энекәш” китабы авторы Гөлүсә Закирова Борнаш мәктәбендә очрашуда катнашты

(8 декабрь, “Апастово-информ”).

Гөлүсә Закированың “Энекәш” китабын тәкъдим итү кичәсе узды.
Борнаш урта мәктәбе коллективы авторны ныклы әзерлек белән каршы алды. Кичәдә махсус хәрби операциядә һәлак булган егетләрнең якыннары да катнашты.
Укучылар “Энекәш” китабыннан өзекләр сәхнәләштерделәр. Әле яшь кенә булсалар да, тормыш чынбарлыгын күңелләре аша уздырып, аларны кичәдә катнашучыларга җиткерә белделәр.
Гөлүсә Закирова “Энекәш” китабын язу тарихы турында сөйләде. Китапта урын алган мизгелләр белән уртаклашты.
Китап, Кече Болгаер егете, авторның махсус хәрби операциядә һәлак булган бертуган энесе Илнур Закировка багышлана. Ачык йөзле, ярдәмчел, батыр якташыбыз Илнур Борнаш мәктәбендә белем алучы укучыларга һәм белем бирүче укытучыларга да таныш һәм бик якын иде.

“Йөрәктән кан савып язылган әсәр. Ул вакыттагы кичерешләрем. Авылда иген игәсе, бала үстерәсе, авылны яшәтәсе егетләр язмышы. Әсәр нинди генә авырлыклар килсә дә, кеше булып калу идеясен алга сөрә”, - диде Гөлүсә Закирова.