Апаста кабаттан әти-әни булу сөенечен татыган гаиләләр хөрмәтләнде
Яңа ел ике гаиләгә татлы бәхет алып килде.
(16 гыйнвар, “Апастово-информ”).
Свияжный бистәсеннән Вәлиуллиннар гаиләсендә кыз бала, Апастан Шараповлар гаиләсендә ир бала дөньяга аваз салды. Ике гаилә дә өченче тапкыр әти-әни булды.
Районның ЗАГС бүлегендә иң беренчеләрдән булып балаларын теркәгән әлеге бәхетле гаиләләр хөрмәтләнде. Аларны район башлыгы Айрат Җиһаншин тәбрик итеп, туу турындагы таныклык һәм бүләкләр тапшырды.
Шулай ук районның ветераннар Советы җитәкчесе Гөлнур Насыйбуллина да теләкләрен җиткерде. “Садә” ансамбле иң матур җырларын бүләк итте.
"Радик һәм Ландыш Вәлиуллиннар кызларына Раилә исемен, Алмаз һәм Алсинә Шараповлар улларына Раяз исемен кушкан. Сабыйларның пар канатлар астында бик бәхетле булып үсүләрен телибез", - ди ЗАГС бүлеге җитәкчесе Розалия Насыйбуллина.
Следите за самым важным и интересным в Telegram-каналеТатмедиа
Нет комментариев