Программа идарә итүгә системалы якын килүне күздә тота: уртак принциплар кертелә, нәтиҗәләр белән идарә итү кораллары кулланыла, хезмәткәрләр инициативасын үстерү механизмнары булдырыла. Эшкә шулай ук тышкы экспертлар да җәлеп ителә, бу исә практик нәтиҗәләргә тизрәк ирешергә мөмкинлек бирә.
Бу үзгәрешләрнең ничек гамәлгә ашырылуы, бүгенге нәтиҗәләр һәм киләчәккә караш турында безгә Апас муниципаль районы башлыгы Айрат Габделхак улы Җиһаншин сөйләде.
-Айрат Габделхак улы! Районда “Сакчыл муниципалитет” кертү карары ни өчен кабул ителде?
-Без бу карарны эчке процессларны гына түгел, ә халык ихтыяҗларын да исәпкә алып кабул иттек. Бүген кешеләр муниципаль хакимияттән аңлаешлы, тиз һәм сыйфатлы карарлар көтә. Практика күрсәткәнчә, кайбер идарә карарлары артык озак кабул ителә, ресурслар һәрвакыт нәтиҗәле кулланылмый. Болар барысы да хезмәтләр сыйфатына тәэсир итә. “Сакчыл муниципалитет” - безнең өчен идарә системасын камилләштерү коралы. Ул гамәлдәге модельне алыштырмый, ә тулыландыра, хезмәт күрсәтү сыйфатын арттырырга ярдәм итә.
-Программа ничек башланып китте?
- Эш бердәм алымнар һәм кораллар формалаштырудан башланды. Беренче чиратта норматив һәм методик база булдырылды. Аннары эталон мәйданчык билгеләнде, анда процессларны оештыру, стандартлаштыру һәм визуаль идарә элементлары сыналды. Бу тәҗрибә соңыннан башка бүлекләргә дә таратыла башлады.
-Хәзерге вакытта программа кайсы этапта?
-Эш этаплап бара. Башлангыч чорда сакчыл идарә инструментлары Район Советы аппараты, Башкарма комитет һәм кайбер ведомство карамагындагы учреждениеләрдә кертелде. Хәзер бу алым авыл җирлекләренә дә тарала. Программа өч төп модульгә нигезләнә: “Тәртип”, “Күрсәткеч” һәм “Яхшырту”.
-“Тәртип” модуле нәрсәне аңлата?
-Бу - идарә итүнең нигезе. Эш урыннарын, документларны һәм хезмәткәрләр гамәлләрен стандартлаштыру турында сүз бара. Артык гамәлләр бетерелгәндә, мәгълүмат эзләү вакыты кыскарганда, эш тизләнә, хаталар кими. 5С инструменты монда төп роль уйный.
-“Күрсәткеч” модуле турында да әйтеп үтсәгез иде.
-Бу модуль мәгълүматларга нигезләнеп идарә итүгә күчүне аңлата. Без эшне генә башкарып калмыйча, нәтиҗәләрне дә ачык күрергә тиеш. Моның өчен “Максат” бурычлар белән идарә итү системасы һәм “Инфостенд” платформасы кулланыла. Алар ярдәмендә район күрсәткечләре онлайн режимда күзәтелә, бу җитәкчеләргә тиз арада карарлар кабул итәргә мөмкинлек бирә.
-“Яхшырту” модуле нинди мөмкинлекләр ача?
-Иң мөһиме - кешеләрне үзгәрешләргә җәлеп итү. Хезмәткәрләр проблемаларны үзләре күреп, тәкъдимнәр кертә башлый. Бу - сәламәт идарә культурасы. Һәр инициатива конкрет нәтиҗә бирергә тиеш.
-Программада тышкы партнерлар катнашамы?
-Әйе, без тәҗрибәле оешмалар белән хезмәттәшлек итәбез. Шуларның берсе - “Сетевая компания” акционерлык җәмгыяте. Аларның белгечләре методик ярдәм күрсәтә, процессларны камилләштерүдә зур өлеш кертә. Без компания җитәкчелегенә һәм коллективына рәхмәтлебез.
-Үзгәрешләр нинди юнәлешләрне колачлады?
-Чынлыкта, муниципалитет эшчәнлегенең барлык төп тармакларын: цифрлаштыру, башкару дисциплинасы, гражданнар мөрәҗәгатьләре белән эш, кадрлар үсеше. Иң мөһиме - һәр проект халыкка реаль файда китерергә тиеш.
-Бу процесста иң авыры нәрсә?
-Идарә итү фикерен үзгәртү. Кешеләр гадәтләнгән алымнардан баш тартырга тиеш. Күпләр эш күләменең зур булуын нәтиҗәлелек дип кабул итә, ләкин бу алай түгел. Без проблемаларны соңыннан хәл итүдән алдан кисәтү системасына күчәргә тиеш.
-Хезмәткәрләрне бу эшкә ничек җәлеп итәсез?
-Бу процесс акрын бара, ләкин тотрыклы. Даими анализ, җитәкчеләр белән эш, уртак стандартлар кертү - болар барысы да бер юнәлештә хәрәкәт итәргә ярдәм итә.
-Төп нәтиҗә нинди дип саныйсыз?
-Иң зур нәтиҗә - сакчыл алымның даимиидарә системасына әверелүе. Ягъни ул аерым проект түгел, ә көндәлек эшнең нигезе булырга тиеш. Бу очракта гына халык чын үзгәрешләрне тоячак: хезмәтләр тизрәк күрсәтелә, аларның сыйфаты арта, бюрократия кими.
Ахыр чиктә, төп максат үзгәрми - район халкының тормыш сыйфатын яхшырту.
-Әңгәмәгез өчен рәхмәт!
Нет комментариев