Татарстанның 3,8 меңнән артык предприятиесе 7 елга кадәр кадр ихтыяҗларын ачты

Анкеталау барышында алынган мәгълүматлар якындагы җиде елга университетларга һәм колледжларга кабул итү планын төзү өчен нигез булып хезмәт итәчәк. Бу хакта ТР «Россиядә эш» кадр үзәгенең матбугат хезмәте хәбәр итә.

Матбугат хезмәтендә сөйләүләренчә, «Анкеталау барышында иң зур активлыкны эшкәртү сәнәгате предприятиеләре күрсәтте – эш бирүчеләрнең 25% тан артыгы җавап бирде. Өчлеккә шулай ук опт һәм розница сәүдәсе оешмалары (17,6%) һәм мәгариф өлкәсе (10,8%) керде».

Киләчәктәге кадр заказын формалаштыруда зур кызыксынуны транспортлау һәм саклау (8,5%), мәгълүмат һәм элемтә (7,7%), сәламәтлек саклау һәм социаль хезмәтләр (5,9%), шулай ук профессиональ, фәнни һәм техник эшчәнлек (6,6%) өлкәләрендәге компанияләр күрсәтте.

ТР «Россиядә эш» кадр үзәге җитәкчесе Тимур Муллин: «Анкеталау нәтиҗәләре – Татарстанда кадрлар әзерләү системасының барлык өлешләре өчен юл картасы. Без сәнәгатьтән һәм бизнестан чын ихтыяҗны күрәбез, һәм безнең бурыч – аны белем бирү программалары белән синхронлаштыру. Тикшеренү йомгаклары буенча без кабул итүнең контроль саннарын гына төзәтмичә, республиканың колледжларында һәм югары уку йортларында яңа популяр юнәлешләр ача алачакбыз», – дип ассызыклады.

Анкеталау Россия Хезмәт министрлыгының Бөтенроссия хезмәт фәнни-тикшеренү институтының цифрлы платформасында уздырыла. Җыелган мәгълүматлар төбәк икътисадына киләчәктә нинди белгечләр кирәк булачагын билгеләргә ярдәм итәчәк.

2025 елда анкеталауда 6,3 меңнән артык эш бирүче катнашты. Тикшеренү барышында алынган мәгълүматлар төбәкләр һәм тармаклар дәрәҗәсендә дефицитлы һөнәрләрне ачыкларга ярдәм итәчәк, яңадан әзерләү дәүләт программалары өчен нигез булып хезмәт итәчәк.