Лимонлы су ябыктырамы?

Иртән ач карынга лимонлы су эчү, күпләр уйлаганча, майларны яндыруны башлап җибәрми һәм организмнан токсиннарны чыгармый, әмма иммунитетка һәм кан тамырлары сәламәтлегенә уңай йогынты ясый. Бу хакта “РИА Новости”га Росбиотех университетының диетология кафедрасы доценты Анастасия Лебедева сөйләгән. "Лимон С витаминына бай. Ул кан тамырларының иммунитеты һәм сәламәтлеге өчен мөһим, ләкин майларны яндыруга турыдан-туры йогынты ясамый һәм токсиннарны чыгармый. Лимонлы су майны яндырмаса да, ул авырлыкны киметүгә читләтеп ярдәм итә ала", - ди диетолог.

Аның сүзләренчә, лимон суга тәм бирә, бу калориялерәк иртәнге эчемлекләрне – татлы чәй, куе сөтле кофе яки сутларны алыштыра ала. "Иртәнге аш алдыннан эчелгән лимонлы су ашказанында урын алып тора, туклык хисе тудыра, ачлыкны йомшарта һәм порцияләрне киметергә ярдәм итә", - ди Лебедева. Ул билгеләвенчә, нормаль метаболизм өчен җитәрлек су эчәргә кирәк, ә ач карындагы бер стакан су артыгын ашаудан качарга ярдәм итә. "Моннан тыш, лимон кислотасы тозлы кислота эшләп чыгаруны һәм үт чыгуын стимуллаштырырга, аксымның үзләштерелүен һәм майларның таркалуын яхшыртырга мөмкин", - ди диетолог.

Автор: Юлия Төхбәтуллина

Чыганак: https://kiziltan.ru