Апаслылар бердәм булып чаңгы юлына басты

(21 февраль, “Апастово-информ”).

Спорт бәйрәмен район башлыгы Айрат Җиһаншин ачып җибәрде.
“Чаңгы - иң популяр һәм иң файдалы кышкы спорт төрләренең берсе. Ул бик зур әзерлек, тәвәккәллек таләп итә. Шунысы сөенечле - чаңгы сөючеләр районыбызда елдан-ел арта бара. Барыгызны да шундый матур һәм күңелле спорт бәйрәме белән чын күңелдән котлыйм, исәнлек-саулык, күтәренке кәеф телим”, - диде ул.
Россия Дәүләт Думасы депутаты Марат Нуриев та якташларын сәламләп, җылы сүзләрен җиткерде.
“Апаста спорт белән шөгыльләнү өчен барлык мөмкинлекләр дә җитәрлек. Яңадан-яңа спорт биналарының калкып чыгуы - бик сөендерә.  Шуңа күрә, яшьләр арасында киләчәктә чемпионнар үсәчәгендә шигем юк. Һәрчак шулай спорт җанлы һәм актив булып калыгыз,  - диде  якташыбыз.
Чаңгы шуу базасы иртәдән үк спорт сөючеләр белән гөрләп торды. Яшьләр, укучылар, оешма-предприятие хезмәткәрләре, лаеклы ялдагы апа-абыйлар, гомумән, спортка битараф булмаган кешеләр һәммәсе чаңгыларын кыстырып, бәйгегә килде. Ярышлар бик мавыктыргыч, күңелле узды, һәркемгә күтәренке кәеф бүләк итте.
Призлы урыннар алуга ирешкән барлык җиңүчеләргә дә Мактау грамоталары, бүләкләр тапшырылды.