Апас районы басуларында эш кайный

  Язгы кыр эшләрен башкарып чыгар өчен техникалар үзвакытында эшкә тотына алды. 
Бүгенге көндә 91% ка чәчү тәмамланган. Шул исәптән язгы бөртекле культуралар - 99%, техник культуралардан - көнбагыш - 98%, шикәр чөгендере - 79%ка чәчелгән.  Шулай ук  силос өчен кукуруз чәчә башладылар. Бу эш әлегә 530 гектарда башкарылды.
Күпчелек хуҗалыклар гербицидлар белән эшли башладылар, тамырдан тукландыру эшләре дә бара.
Эш бик кызу бара, чөнки әйтелгәнчә: "Язның бер матур көне елны туйдыра." Шуңа күрә, безнең эш батырлары яхшы уңыш алу өчен мөмкин кадәр күбрәк эшләргә тырышалар. Бу хакта район авыл хуҗалыгы һәм азык-төлек идарәсе җитәкчесе Радик Гыйсмәтов хәбәр итте.
“Шагабиев” хуҗалыгында да бүгенге көндә эш кайный. 
“Хәзерге вакытта без Морзалар авылы янында 207 гектарда арпа кырына сыек ашлама кертәбез. Тамырга - язгы бодай һәм арпага. Шулай ук бүгенге көндә чүп үләннәренә каршы көрәшәбез, гербицидлар белән эшлибез”, - дип хәбәр итте “Шагабиев” хуҗалыгы идарәчесе Хәйдәр Зәйнетдинов.

 _{Видео: "Шагабиев" хуҗалыгы басулары.}