«Идел» көтә: Татар яшьләренең зур очрашуы 26–30 августта башлана

Әлеге көннәр — төрле төбәкләрдән, хәтта чит илләрдән килгән яшь татарлар өчен уникаль мәйдан. Монда алар бер-берсе белән таныша, фикер алыша, яңа дуслык элемтәләре булдыра. Форумның төп нияте — милләтнең рухи мирасын саклау, туган телгә һәм тарихка мәхәббәт уяту, яшьләр арасында милли үзаңны ныгыту.

Быел делегатлар саны 180 кешегә җитәчәк — алар Россиянең 27 төбәгеннән һәм Казахстаннан юл тота. Катнашучыларны бай программа көтә: кызыклы лекцияләр, татар теле һәм тарих дәресләре, кичке дискотекалар һәм мәдәни чаралар. Шулай ук остаханәләрдә алар вокал, бию, актерлык сәнгате һәм кул эшләре серләрен өйрәнә алачак. Аерым игътибарга — сәясәт, сәнгать, журналистика, дин, спорт һәм башка юнәлешләрнең танылган вәкилләре белән очрашулар. Алар лекция, дискуссия, панель сессияләр һәм туры әңгәмә форматында узачак. Һәркемгә спикерларга сорау бирергә, үз тәҗрибәсе белән уртаклашырга, ерак төбәкләрдән килгән фикердәшләр белән аралашырга мөмкинлек биреләчәк.

Ә инде традицион бәйгеләр — «Идел кызы», «Идел егете», «Танцпол йолдызы», «Идел моңы» — елдагыча тамашачыларны сокландырачак. Бу яшьләр көннәрен онытмаслык итәргә вәгъдә итә.