Росстат аена 200 мең сумнан артык хезмәт хакы булган тармакларны атады

Иң югары хезмәт хакы финанс һәм иминиятләштерү өлкәләрендә билгеләнгән, анда уртача хезмәт хакы 314 мең сум тәшкил иткән.

Нефть һәм табигый газ чыгару өлкәсендә, шулай ук мәгълүмат һәм элемтә өлкәсендә уртача хезмәт хакы 226 мең сумга җиткән. Һава һәм галәм транспорты тармагында бу күрсәткеч 223 мең сум, ә тәмәке әйберләре җитештерүдә – 218 мең сум булган.

Росстат мәгълүматлары буенча, Рәсәйдә быелгы мартта уртача исәпләнгән хезмәт хакы 112 654 сум тәшкил иткән.

Татарстанда уртача айлык исәпләнгән хезмәт хакы мартта 99 123 сумга җиткән. Аннан бер ай элек, февральдә, бу күрсәткеч 90 787 сум тәшкил иткән иде.