Апасның яшь хоккейчылары көчле уен күрсәтте

(4 май, “Апастово-информ”).

Апасның боз сараенда хоккейның дуслык һәм спорт рухында үткән соңгы уеннары оештырылды. Әлеге чарага Казаннан өч хоккей командасы да килде. Уеннарда Апас районы хоккейчылары көчле уен күрсәтеп, җиңү яуладылар.

Чара барышында балалар өчен истәлекле бүләкләр тапшырылды. Ата-аналар һәм иганәчеләр ярдәме белән, “Армада” хоккей командасының уенчылары үз исемнәре һәм команда эмблемасы белән бизәлгән рюкзаклар белән бүләкләнделәр.

Әлеге бәйрәм спорт уеннары белән генә чикләнмәде. Барлык кунаклар һәм катнашучылар өчен бәйрәм ашлары әзерләнде. Урамда теләүчеләр өчен тәмле пилмәннәр, кайнар чәк-чәк һәм чәй тәкъдим ителде.

Апас балалары үзләренең көчле һәм тәвәккәл булуларын һәр чарада раслыйлар.
“Оештыручыларга һәм чарага ярдәм күрсәткән иганәчеләргә зур рәхмәтебезне җиткерәбез. Сезнең ярдәм һәм игътибар балаларның киләчәген яктырта һәм аларны зур уңышларга илһамландыра!” - дип хәбәр итте бу хакта район башлыгы урынбасары Ленар Хантимиров.