Электрон Мактау тактасына тәкъдим ителгән кандидатлар белән таныштыруны дәвам итәбез.
Татарстан Республикасы Рәисе инициативасы белән гамәлгә куелган әлеге проект хезмәте белән танылган, һөнәри осталыгы һәм үз эшенә тугрылыгы белән аерылып торган кешеләрнең казанышларын бәяләүгә юнәлдерелгән.
Бүгенге кандидатыбыз - Апас урта мәктәбенең география укытучысы Валиева Лилия Мөнир кызы. Аның мәгариф өлкәсендәге гомуми хезмәт стажы - 31 ел. Лилия Мөнир кызы 2019нчы елдан район география укытучыларының методик берләшмәсен җитәкли. Ул конкурс һәм олимпиада эшләрен тикшерү буенча муниципаль комиссия рәисе, 2013нче елдан Татарстан Республикасы педагогик хезмәткәрләрен аттестацияләү буенча республика комиссиясе эксперты булып тора.
Тәҗрибәле педагогның профессиональ казанышлары да саллы. Ул 2016нчы елда “Россиянең сәламәтлек укытучысы” Бөтенроссия конкурсының республика этабы лауреаты, “Ел укытучысы-2019” конкурсының муниципаль этабы призеры булды. 2018нче елда “Укытучы-остаз” республика конкурсы грантына һәм Апас районы башлыгы грантына лаек булды. 2019нчы елда “Минем һөнәрем – остаз” төбәкара конкурсы лауреаты исемен алды.
2020нче елда Лилия Мөнир кызы “Йөрәгемне балаларга бирәм” һәм “Иң яхшы география укытучысы” Бөтенроссия конкурсларының муниципаль этапларында җиңү яулады, “Иң яхшы география укытучысы” Бөтенроссия конкурсында катнашты. 2021нче елда “Заповедные тропы” республика конкурсында җиңүче булды. Укытучының нәтиҗәле хезмәте укучыларының уңышларында да чагыла. Аның җитәкчелегендә мәктәп укучылары Татарстанның яшь географлары турнирында актив катнашып, призлы урыннар яулый. Укучылар предмет олимпиадаларында да уңышлы чыгыш ясый.
Лилия Мөнир кызы экологик юнәлештә дә актив эш алып бара. Ул мәктәпнең “Стрела” экологик отрядын җитәкли. Аның укучылары республика яшь натуралистлар хәрәкәтендә һәм “Будет Чисто” республика экологик хәрәкәтендә катнашалар. Педагогның хезмәте дәүләт һәм республика дәрәҗәсендә дә бәяләнгән. 2020нче елда ул Татарстан Республикасы Мәгариф һәм фән министрлыгының Мактау грамотасы белән, 2021нче елда Татарстан Республикасы Иҗтимагый палатасының Рәхмәт хаты белән бүләкләнде. 2023нче елда “Мәгарифтәге казанышлары өчен” күкрәк биләгенә лаек булды.
Лилия Вәлиеваның күпьеллык педагогик хезмәте, һөнәри осталыгы һәм яшь буынны тәрбияләүгә керткән өлеше аны Электрон Мактау тактасына тәкъдим итәргә лаеклы кандидатларның берсе итә.
Нет комментариев