Машиналарында балалар булган юл йөрү кагыйдәләрен бозучыларга штрафларны арттырырга тәкъдим итәләр

“Татар-информ” хәбәр иткәнчә, бу инициатива турында Дәүләт Советында Законлылык һәм хокук тәртибе комитеты утырышында сөйләштеләр. 
Татарстан юлларында балалар катнашындагы юл-транспорт һәлакәте статистикасы куркыныч – быелның ике аенда 40 юл-транспорт һәлакәте булган, аларда бер бала һәлак булган һәм 45е җәрәхәтләнгән. Узган ел белән чагыштырганда юл-транспорт һәлакәте саны алты очракка, һәлак булучылар – бер, яраланган балалар - ике очракка арткан.

 "Пассажир балалары булган юл-транспорт һәлакәтләрен профилактикалау чараларының берсе буларак, дәүләт автоинспекциясе идарәсе юл йөрү кагыйдәләрен тупас бозган өчен җаваплылыкны көчәйтергә тәкъдим итә – транспорт чарасы белән исерек хәлдә идарә итү, шулай ук салонда балигъ булмаганнар булганда кагыйдәләрне бозып "очрашуга" чыгу кебек. Бала белән машинада исерек килеш барган өчен без штрафны 50 мең сумга кадәр арттырырга тәкъдим иттек, ә хокуклардан мәхрүм итү срогы – ике елдан өч елга кадәр. Машинада бала белән каршы як полосага чыккан өчен без штрафны 15 мең сумга кадәр арттырырга тәкъдим итәбез, ә хокуклардан мәхрүм итү срогын – ярты елдан алып бер елга кадәр», – дип сөйләде Татарстан Дәүләт автоинспекциясе башлыгы урынбасары Айрат Сәмигуллин.

Татарстан Дәүләт автоинспекциясе башлыгы урынбасары бу тәкъдимне Дәүләт Советы депутатларына тәкъдим итте. "Безнең комитет юл хәрәкәте куркынычсызлыгы мәсьәләләре белән шөгыльләнде һәм шөгыльләнәчәк. Сез тәкъдим иткән тәкъдим каралачак. Хуплау – димәк, закон чыгару инициативасы белән Дәүләт Думасына чыгу. Ләкин моның өчен безгә Татарстан буенча саннар нигезендә генә түгел, башка төбәкләр мәгълүматлары нигезендә дә күбрәк материал җыярга кирәк. Без билгеле бер эш башкарачакбыз, сорау бирәчәкбез, бу саннарны алачакбыз һәм Дәүләт автоинспекциясе белән бергә эшләячәкбез», – диде Законлылык һәм хокук тәртибе комитеты рәисе Александр Чубаров.