Казан метросында багуны, учак ягуны, сатуны һәм әйберләр алыштыруны тыячаклар

Шулай ук пассажирларга велосипедта һәм самокатларда йөрүне тыячаклар, аларны чехолларда гына йөртергә рөхсәт итәчәкләр. Бу хакта коррупциягә каршы экспертиза уза торган ТР Министрлар Кабинеты Карары проектында хәбәр ителә. 
Документ метрополитеннан файдалану кагыйдәләренә үзгәрешләр кертә. Яңа редакция нигезендә, велосипедлар һәм самокатларны, балаларныкыннан тыш, чехоллар яки төргәкләр кулланып кына алып барырга мөмкин булачак. Аларда җир асты территориясендә йөрү тыела. Шулай ук тыелган гамәлләр исемлегенә хәер сорашу, пассажирларга сату-алу, хезмәт күрсәтү, товар алмашу турында тәкъдимнәр белән мөрәҗәгать итү, шулай ук багучылык кертелгән. Тыюга учак ягу һәм пиротехника куллану эләгә – вагоннарда, инфраструктура объектларында, киртә артында 10 метрдан да кимрәк һәм вентиляция киоскларыннан 25 метрдан да якынрак.
Моннан тыш, велосипедларны, балалар коляскаларын, самокатларны, индивидуаль мобильлек чараларын һәм башка хәрәкәт итү чараларын караусыз калдырырга, шулай ук аларны тоткаларга, коймаларга, ишекләргә һәм башка инфраструктура объектларына беркетергә ярамый. Үзгәрешләр шулай ук пассажирларның чехоллы велосипед һәм самокатлар белән узу тәртибен ачыклый: алар өчен автомат булмаган үткәрү пунктлары каралган. Җиде яшькә кадәрге балаларны аерым урыннан башка, әмма озатып йөрүчегә турыдан-туры якын булу мәҗбүри булган килеш йөртергә рөхсәт итәчәкләр. Яңа кагыйдәләр шулай ук чит затлардан алынган әйберләрне тикшермичә генә алып керүне тыя.
Чыганак – “Татар-информ”.