Олы Бакырчы авылының батыр уллары хөрмәтенә хәтер такталары куелды

  Руслан Мотыйгуллин, Илнар Шәфигуллин, Фирнат Гайнетдинов батырларча һәлак булды. Аларның исемнәре мәңгеләштерелеп, алар яшәгән, яшьлекләре узган йортларына хәтер такталары урнаштырылды.

Хәтер чарасында Россия Федерациясе Дәүләт Думасы депутаты, “Апас” якташлык җәмгыяте җитәкчесе Марат Нуриев һәм җәмгыятьнең вәкилләре катнашты. Авыл кураторы, район авыл хуҗалыгы һәм азык-төлек идарәсе җитәкчесе Радик Гыйсмәтов та килгән иде.

“Башта Бөек Җиңүнең 80 еллыгын тантаналы төстә билгеләп үттек. Апас якташлык җәмгыяте вәкилләре мәктәп балалары белән берлектә ике сәгатьлек концерт куйды. Аннары батырлар хөрмәтенә чәчәкләр, веноклар салдык. Бәйрәм бик матур һәм истәлекле үтте”, - дип хәбәр итте авыл мәдәният йорты җитәкчесе Ландыш Моталлапова.