Апасның электр челтәрләре коллективында – яңа җитәкче

(21 гыйнвар, “Апастово-информ”).

Җитәкчене коллективка район башлыгы  Айрат Җиһаншин һәм Идел буе челтәрләре директоры Вилдан Нигъмәтҗанов тәкъдим итте. 
Әлегә кадәр оешма белән җитәкчелек иткән Ленар Гафаров коллективта эшен җитәкче урынбасары булып дәвам итәчәк. 
Бүген, ягъни, 21 гыйнварда Ленар Гафаров туган көнен билгеләп үтә. Район башлыгы Айрат Җиһаншин аны туган көне белән тәбрик итте һәм күпьеллык нәтиҗәле хезмәте өчен рәхмәтен белдерде. 
Ленар Гафаров районның электр челтәрләре коллективында 32 ел хезмәт итә. Хезмәтнең төрле баскычларын узып, соңгы елларда бар көчен җитәкчелек эшенә багышлады һәм уңышларга иреште. 
“Коллектив миңа бик якын, барыгызның хезмәте күз алдында. Эшләр өчен шартлар да бар. Хезмәтегездә яңа уңышлар телим”, - диде район башлыгы. 
Район электр челтәрләре җитәкчесе  Сергей Камаев киләчәктә аңлашып, дус-тату эшләрбез, нәтиҗәләргә ирешербез дигән максатын белдерде.