Апаста мөмкинлекләре чикле райондашлар өчен мәгълүмати очрашу узды

(1 декабрь, “Апастово-информ”).

Үзәк китапханәдә узган очрашуда физик мөмкинлекләре чикле райондашларга, инвалид балалар тәрбияләүче әти-әниләргә социаль түләү, төрле ярдәм чаралары һәм субсидияләр бирелү турында файдалы мәгълүмат җиткерелде. Район башкарма комитеты җитәкчесенең социаль мәсьәләләр буенча урынбасары Гөлүсә Галләмова районда һәр мөмкинлеге чикле кешеләр һәм балалар игътибар үзәгендә булуын әйтте.
Әлеге чарага килүчеләр район прокуратурасы социаль яклау бүлеге, пенсия фонды, социаль иминият фонды, район үзәк хастаханәсе, мәгариф бүлеге белгечләре белән очрашып, үзләрен кызыксындырган сорауларны бирделәр.