Районда иң матур шәхси йорт, капка төпләре бизәүче хуҗалар билгеләнде

(19 гыйнвар, “Апастово-информ”).

  Заготзерно бистәсендә яшәүче Илдар һәм Рәшидә Хисамовларның йорт бизәлеше быел да иң югары бәя алды. Озак еллар Себердә яшәп әниләре нигезенә кайтып төпләнгән Хисамовлар гаиләсе ел саен үзләре яшәгән йорт алдын, тирә-юнен, капка төпләрен аллы-гөлле утлар белән бизиләр, кар сыннары да ясап куялар.
“Ямалда яшәгәндә Яңа ел бәйрәмнәрен шулай йортларны бизәп, күңелле итеп каршы ала идек. Бу хәзер традициягә әверелде”, - диде йорт хуҗасы Илдар абый Хисамов.
Коштавылыннан Фәһимә Азизова йортын бәйрәмчә рухта бизәп, авылдашларына күтәренке кәеф өләшкән. Апастан Руслан һәм Лилия Абдуллиннар һәм Илгиз һәм Светлана Салаватовлар да Яңа елны зур әзерлек белән каршылап, йортлары янәшәсендә матурлык тудырганнар.