Пәйгамбәребез проблема булганда нишләгән?

  Борчуы, проблемалары булган кеше арып өенә кайткач, нишли? Әйе, йә телевизор кабыза, йә телефонга «кереп китә». Төшенкелек һәм берни эшлисе килмәгән вакыт бу.

  Ә Пәйгамбәребез салләллаһу галәйһи вә сәлләм мондый вакытта нишли иде?

  Расүлуллаһның хатыны Гайшә радыяллаһу ганһу Мөхәммәд салләллаһу галәйһи вә сәлләмнең берәр борчуы булса, аның тиз арада намазга керешүен хәбәр иткән.

  Пәйгамбәребез: «Намаз күзләрем өчен җиләс һава һәм бу дөньяда тынычлык булып тора», – дигән.

  Нәкъ менә намаз аңа тынычлык, рәхәтлек биргән. Ә без боларны башка нәрсәләрдә эзлибез.

  Хәсән Әл-Басри рахимәһуллаһи исемле галим: «Бәхетне өч нәрсәнең берсендә эзләгез: Коръән укуда; Аллаһны зикер кылуда (искә алуда); Намаз укуда», – дигән.

  Һәм болай дип өстәгән: «Әгәр боларның өчесендә бәхетне тапмасагыз, димәк, бәхет ишекләре сезнең өчен ябык, һәм сез аны беркайда да тапмаячаксыз», – дип яза хәзрәт.

_{Чыганак:https://intertat.tatar/news/paigambarebez-problema-bulganda-nislagan-5869228}

_{Фото:https://ru.freepik.com/free-photo/muslim-praying-sujud-posture_2895104.htm#fromView=search&page=1&position=14&uuid=cfcd243c-89a0-4442-b73f-598cd86c5790}