Апас үзәк китапханәсендә сәламәтлек турында сөйләштеләр

(9 апрель, “Апастово-информ”).

Чара барышында киң колачлы мәгълүмати эш алып барылды.

Акушер-гинеколог, онколог табиб Кадрия Мефодьева онкологик авыруларны профилактикалау мәсьәләләре турында сөйләде. Шулай ук репродуктив сәламәтлек темасы да күтәрелде, аның һәр кеше һәм җәмгыять өчен әһәмияте ассызыкланды.

Гомуми практика табибы, инфекционист Гөлсинә Гайнуллина исә дислипидемия мәсьәләсенә тукталды. Әлеге чирнең барлыкка килү сәбәпләре, йөрәк-кан тамырлары системасына йогынтысы һәм аны төзәтү ысуллары турында аңлатты. Сәламәт холестерин дәрәҗәсен саклау өчен туклану һәм физик активлыкны үз эченә алган яшәү рәвешен үзгәртү буенча киңәшләр бирелде. Шулай ук табиблар вакытында диспансеризация үтүнең мөһимлеген искәрттеләр.

Чараның теоретик өлеше практик өлеш белән дә тулыландырылды. Медицина хезмәткәрләре теләгән һәркемгә экспресс-диагностика үткәрде. Кан басымын, күз басымын, пульс, сатурацияне үлчәү, кандагы шикәр күләмен билгеләү кебек гади, ләкин әһәмиятле процедуралар күпләргә үз сәламәтлекләрен бәяләргә һәм күрсәткечләрне яхшырту буенча шәхси киңәшләр алырга ярдәм итте.
Сәламәт яшәү рәвешен популярлаштыруда һәм халык сәламәтлеген ныгытуда узган чара һәркем өчен файдалы булды.