Акчамы, әллә соцпакетмы?

Бу көннәрдә федераль ташламаларга хокуклы булган гражданнар соцпакетмы, әллә акчаны сайларгамы дип "баш ваталар". Вакыт аз калды, 1 октябрьгә кадәр бу мәсьәлә хәл ителергә тиеш. Пенсионерлар үзләре моңа ничек карыйлар икән? Бу турыда аларның үзләреннән сорашырга булдык.

Рузалия Билалова. Апас. - Үз хәлемне үзем беләм. Шуңа күрә ел саен социаль хезмәт җыелмасыннан файдаланам. Күбрәк кан басымыннан дарулар алам. Аяк буыннары сызлаганда мазьлар кирәк була. Катлаулы операцияләр кичергән идем. Кыйммәтле дарулар кирәк булса, кая барып бәрелермен дип куркам. Болай күңелем тыныч.

Сария Гыймадиева. Иске Йомралы. - Мин 3 группа инвалид. Озак еллар бронхиаль астма һәм шикәр авырулары белән интегәм. Миңа билгеләнә торган дарулар бик кыйммәт, кайберләре 2 мең сумнан да артып китә. Шуңа күрә дә социаль хезмәт җыелмасыннан файдаланам. Кирәкле даруларның барысы да вакытында кайтып тора, мин бик канәгать.

Наилә Шиһабиева. Апас. - Әтием 1 группа инвалид. Инсулиннан башка тора алмый. Кирәк-ярак дарулар һәрвакыт җитәрлек кайтып тора. Кайвакыт, мәшәкатьләр белән онытылып киткән очракларда шәфкать туташлары үзләре дә китереп бирәләр. Мин бик рәхмәтле.

Гөлшат Сәлахова. Дүртиле. - Иптәшем Фәрит инсульттан соң озак еллар урын өстендә ята. Аңа 77 яшь. Социаль хезмәт җыелмасы белән бирелә торган бушлай даруларга без бик мохтаҗ. Ай саен табиблар рецепты белән кирәкле даруларны алып торабыз. Беткәнен көтеп тормыйча заказны алдан бирәбез. Әле менә октябрь аена коляскага да заказ бирдек. Анысы 4 елга бер тиешле. Шуны көтәбез.

Наиль Сөләйманов. Апас. - Яз-көз айларында авырулар кискенләшкәч хастаханәдә дәваланырга туры килә. Бушлай дарулардан баш тарту турында уйламыйм да. Табиблар һәрвакыт хәлгә керәләр. Үземә кирәкле барлык төр дарулар да булып тора.

Район үзәк хасатаханәсенең баш табибы Фатыйх Хәйдәров: - Федераль ташламага ия булучы гражданнарның социаль хезмәт җыелмасына яки акчалата ярдәмгә хокуклары бар.

Фикерен үзгәртмәгән кешеләргә Пенсия фондына барып йөрергә кирәкми. Әгәр дә инде, кире уйлаган булса, 1 октябрьгә кадәр кабат гариза язырга кирәк булачак. Социаль хезмәт җыелмасы 795 сум 88 тиенне тәшкил итә. Дарулар буенча - 613 сум; санатор-курорт юлламасы - 94 сум, 83 тиен; транспорт буенча - 88 сум 5 тиен. Шулай да, билгеләнгән дарулар социаль хезмәт җыелмасы өчен бирелә торган акча бәясеннән кыйммәтрәк булырга мөмкинлеген истән чыгарырга ярамый. Акча файдасына хәл иткән кешеләргә дарулар бушлай бирелмәчәк. Кайбер кешеләр "Хәлем әйбәтләнә башлады, авыруым да борчымый" дип, дәүләт ярдәмен акчалата алуны өстенрәк күрәләр. Авыру кискенләшә башлагач, әлбәттә, соң була. Акча җитми башлый. Кыйммәтле дарулар кирәк була. Гаилә бюджетына да "зыян килә".

Һәр кеше үзе өчен дөрес юлны сайласын иде. Төрле сәбәпләр белән акча файдасына хәл иткән кешеләр күп очракта "оттыралар". Кире уйларга да соң була. Ел дәвамында социаль хезмәт җыелмасыннан файдаланып булмаячак. Шуңа күрә алдан акчалата алучы гражданнар фикерләрен үзгәртеп, сәламәтлегем мөһимрәк дип уйлыйлар икән, 1 октябрьгә кадәр пенсия фондына килсеннәр. Бушлай дару алучыларга яңадан гариза язып торырга кирәкми.